МУЛОҚОТИ РАИСИ МАҶЛИСИ МИЛЛИИ МАҶЛИСИ ОЛИИ ҶУМҲУРИИ ТОҶИКИСТОН, РАИСИ ШАҲРИ ДУШАНБЕ МУҲТАРАМ РУСТАМИ ЭМОМАЛӢ БО ПРЕЗИДЕНТИ ФЕДЕРАТСИЯИ БАЙНАЛМИЛАЛИИ ВЕЛОСИПЕДРОНӢ ҶАНОБИ ДАВИД ЛАППАРТИЕН ВА ПРЕЗИДЕНТИ КОНФЕДЕРАТСИЯИ ВЕЛОСИПЕДРОНИИ ОСИЁ ОСАМА АЛ ШАФАР

 

ш.Душанбе. 26.03.2022. Имрӯз Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, муҳтарам Рустами Эмомалӣ Президенти Федератсияи Байналмилалии велосипедронӣ ҷаноби Давид Лаппартиен ва Президенти Конфедератсияи велосипедронии Осиё Осама ал Шафарро ба ҳузур пазируфтанд.
Дар нишаст масоили марбут ба варзиши велосипедронӣ ва рушди он дар минтақа баррасӣ гардид. Муҳтарам Рустами Эмомалӣ ташрифи меҳмонони олиқадрро ба пойтахти кишвар - шаҳри Душанбе дар фасли баҳору Иди байналмилалии Наврӯз хайрамақдам гуфта, барои макони ин чорабинӣ интихоб шудани шаҳри Душанбе ва дар сатҳи баланд ташкил ва гузаронидани чорабинии мазкур изҳори сипос намуданд. Ҳамчунин вобаста ба рушди варзиши велосипедронӣ ва рафти баргузории Чемпионати Осиё оид ба велосипедронӣ дар шоҳроҳ, ки дар пойтахти кишвар ҷараён дорад, мубодилаи афкор намуданд.
Президенти Федератсияи Байналмилалии велосипедронӣ Давид Лаппартиен ва Президенти Конфедератсияи велосипедронии Осиё Ҷаноби Осама ал Шафар барои дастгирии ҳамаҷониба ҷиҳати дар сатҳи олӣ ҷараён доштани Чемпионати Осиё оид ба велосипедронӣ дар шаҳри Душанбе ба Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, муҳтарам Рустами Эмомалӣ сипосу миннатдорӣ баён намуданд.
Раиси шаҳри Душанбе муҳтарам Рустами Эмомалӣ пешниҳод карданд, ки барои муаррифӣ ва рушди ин намуди варзиш дар Ҷумҳурии Тоҷикистон солҳои оянда мусобиқаи байналмилалии велосипедронии кӯҳи гузаронида шавад. Вобаста ба ин масъала ҷонибҳо ба мувофиқа расида, зикр гардид, ки баъд аз пешниҳоди ҳуҷҷатҳои лозима аз ҷониби Федератсияи велосипедронии Тоҷикистон ин чорабинии варзишӣ дар ояндаи наздик баргузор хоҳад гашт.
Иброз гардид, ки солҳои охир барои баргузории мусобиқаҳои сатҳи ҷаҳонӣ дар пойтахти мамлакат - шаҳри Душанбе бо дастгириҳои пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон шароиту имконоти мувофиқ ва ҳам ҷавобгӯ ба талаботи ҷаҳонӣ фароҳам гардида, дилхоҳ мусобиқаҳои байналмилалии варзиширо шаҳри Душанбе метавонад мизбонӣ намояд.
Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе, муҳтарам Рустами Эмомалӣ аз меҳмонон изҳори ташаккур намуда, дар анҷоми нишаст ҳозиринро аз номи мақомоти иҷроияи ҳокимияти давлатии шаҳри Душанбе муттақид сохтанд, ки ҷиҳати дар сатҳи баланд гузаронидани чорабиниҳои зикргардида, бахусус мусобиқаи байналмилалии велосипедронии кӯҳӣ дастгирии ҳаматарафа ва бевосита пешниҳод месозанд.


© 2021 Муассисаи давлатии «Рекламаи берунӣ ва ороиши шаҳри Душанбе»